35 Qof Oo Ku Dhintay Shil Ka Dhacay Sucuudiga
17 Oct 2019
Makka, (HCTV) – 35 qof ayaa ku dhintay kadib markii baskii ay saarnaayeen uu ku dhacay baabuur kale, meel u dhow magaalada barakaysan ee Medina, sida ay baahiyeen maanta oo khamiis ah warbaahinta dowladda Sacuudigu.
Shilkan ayaa dhacay habeenkii Arbacada, sida uu sheegay afhayeenka booliska magaalada Medina, oo ay soo xigatay wakaaladda wararka Sacuudiga ee SPA.
Dadka ku dhintay shilkan ayaa ahaa Carab iyo Asian ka safrayey Medina una socday Makkah, si ay usoo Cumrah gutaan, sida ay sheegtay warbaahinta dowladda oo muujisay sawirrada baska oo holcaya.
Wakaaladda wararka SPA ayaa sheegtay in dadka dhaawacmay la geeyey isbitalka Al-Hamna. Mas’uuliyiinta ayaa billaabay baaritaan.
Wargeyska Okaz ee Sacuudiga ayaa sheegay in dhibanayaasha ay ahaayeen ajaanib ku nool Sacuudiga oo soo Cumrah gudanayey.
Barasaabka gobolka Medina, Amiir Faisal bin Salman ayaa tacsi u diray ehellada dhibanayaasha.
Weli lama shaacin dalalka ay u dhasheen dhibanayaasha, balse ra’iisul wasaaraha India Narendra Modi ayaa sidoo kale ka tacsiyeeyey shilkan.
HORN CABLE TV,
WAAXDA ONLINE-KA.
