Turkiga Oo Muqdisho Soo Gaadhsiiyey Dhaqaatiir Iyo Dawooyin
29 Dec 2019
Muqdisho, (HCTV) – Dowladda Turkiga oo ka jawaabaysa dhibaatadii ka dhalatay qarixii argagixiso ee shalay ka dhacay magaaada Muqdisho ayaa soo gaadhsiiyey Gurmad Isugu jira Dawooyin iyo Dhakhaatiir.
Waxaanay Diyaaradii sidday dhaqaatiir iyo dawooyinku ka soo degtay garoonka diyaaradaha Aadan Cadde ee magaalada Muqdisho.
Wasiirka Warfaafinta Xukuumadda Federaalka Soomaaliya iyo mas’uuliyiin kale oo ka tirsan dowladda Soomaaliya ayaa ku soo dhaweeyey garoonka diyaaradaha Aadan Cadde wafdigaasi dhaqaatiirta ah, iyagoona guddoomay daawooyinkii dowladda Turkigu ay ugu talagashey dadkaasi dhaawacyada qaba.
Dowladda Soomaaliya ayaa uga mahad celisay Dowladda Turkiga sida walaaltinimada leh oo ay ugu taagan tahay ka jawaabista baahiyaha shacabka Soomaaliyeed iyo gurmadyada deg dega ah xiliyada ay musiibooyinku ay geystaan kooxaha argagixisada ee Alshabaab.
Qarixii shalay ka dhacay Ex-Koontarool Afgooye ayaa sababay khasaarooyin isugu jira dhimasho iyo dhaawac, iyadoo dowladda Soomaaliya ay xoogga saartay sidii dadka dhaawacyada culus qaba loogu qaadi lahaa caafimaad dibadda ah.
HORN CABLE TV,
WAAXDA ONLINE-KA.
