Madaxweynaha Somaliland Oo Heegan Geliyey Ciidammada Qaranka (Akhri Sababta)

Hargeysa (HCTV) – Madaxweynaha Somaliland,  ahna taliyaha guud ee ciidanka qalabka sida, Mudane Muuse Biixi Cabdi, ayaa maanta kormeer isugu jira wacyigelin iyo kormeer ku tegay taliska guud ee ciidanka qaranka iyo xerada ciidanka ee Birjeex, isaga oo sidoo kale dhammaanba ciidamada kala duwan ee qalabka sidana geliyey heegan buuxa, xaaladda kasoo korodhay xanuunka CORONA VIRUS oo ah masiibo cusub oo dunida ku soo korodhay awgeed.

Madaxweynaha Somaliland oo ay wehelinayaan taliyaha ciidanka qaranka, sareeye gaas Nuux Ismaaciil Taani, qaar ka mid ah saraakiisha ugu sarraysa ciidanka qaranka iyo xubno ka mid ah golaha wasiirrada, ayaa booqashadiisa ka bilaabay taliska guud ee ciidanka oo ay heegan ku ahaayeen Abbaan duulaha, saraakiisha kala duwan iyo taliyayayaasha kala duwan ee ciidanka, waxana uu halkaas ka jeediyey khudbad ballaadhan oo uu ciidanka ku hogo-tusaaleeyey waajibaadka ciidan ahaan ka saaran ka hortagga xanuunka saf-marka ah ee  CORONA VIRUS iyo ka hortagga haddii uu dalka soo galo.

Ugu horrayn waxa uu Madaxweynuhu ciidanka qaranka uga mahadnaqay hawsha ballaadhan ee ay dalka u hayaan, isaga oo caddeeyey inaanu xanuunkaasi weli soo gaadhin dalka, balse haddii la arko ay ciidamadu yihiin cududda kaliya ee  dhibaatadaas samato-bixinteeda ka qayb qaadan kara,  “Qarankiinnu wuu idin og yahay, maantana shirkiinna aannu kasoo qayb galnay, waxannu ugu nimi inaannu idinkala hadalno laba qodob. Shalay waad dhegaysateen oo ummaddaanu la hadalnay, waxa ka jira maanta waad og tihiin iyo xanuunka adduunka oo dhan ka khal-khaliyey, Somaliland Ilaahay mahaddii ilaa saaka weynu nabad qabnaa, laakiin feejignaan weyn, dedaal weyn iyo diyaargarow weyn ayeynu u baahan nahay, maanta dal waliba waxa uu kaga bixi karaa masiibadaas, ama uu ku yarayn karaa ama kaga hortegi karaa awoodda ciidamadiisa, waana maalintii ciidamo loo baahnaa nooc ay yihiinba,” ayuu yidhi Madaxweyne Muuse Biixi Cabdi.

Madaxweynaha Jamhuuriyadda Somaliland, Mudane Muuse Biixi, waxa uu ciidanka xusuusiyey waajibaadka ka saaran marka ay xaaladaha noocan oo kale ahi yimaaddaan, isaga oo sidoo kale uga warramay ujeeddada uu ugu yimi, “Maanta intuu dalku leeyahay cudud maamuli karta dalka xuduudihiisa iyo gudihiisaba ayey ku sinnaanaysaa  badbaadadiisu si ay u yaraato dhibaatada uu xanuunkaasi leeyahay haddii uu ina soo gaadho, markaa waxannu si gaar ah idiinku nimi inaannu idinka wacyigelinno halka ay wax marayaan, hawsha inoo taalla iyo nin kasta oo ciidan ah iyo gabadh kasta oo ciidan ah iyo qof kasta oo xilkas ah hawsha u taalla.”

Madaxweynuhu isaga oo hadalkiisa sii wata waxa uu intaas ku daray, “Maanta waxa aynnu ka hortegaynaa masiibo adduunka oo dhan gaadhay oo aynaan garanayn meel ay kaaga imanayso oo aan dawo lahayn oo meel kaaga soo socoto iyo si ay u imanayso aan la garanayn oo loo baahan yahay inaynu iska maarayno, sidaas darteed farriinta aan ciidanka ugu imid waa in heegan buuxa la galo, xilkii hore ee aad hayseen ee qaran ee dalka difaaciisa ahaa ee awalba aad idinku u taagnaydeen, tanna way inagu soo korodhay.”

Madaxweynaha Jamhuuriyadda Somaliland, Mudane Muuse Biixi Cabdi waxa uu tilmaamay in shacabka reer Somaliland yihiin dad isku duuban, balse ay maanta kusoo socoto duruuf u baahan inay sii adkeeyaan midnimadeeda, waxaana isaga oo arrimahaas ka hadlaya uu yidhi, “Innaga Ilaahay wuxuu ina siiyey shacbi Ilaahooda aaminsan, isku kalsoon, dawladoodda dhista, markay dhibaato joogtana u midooba, kooda taagta daran, ka buka, ka taajirka ah, ka xoogga ah, jeneraalka, dablaha, xammaalka iyo ka curyaanka ah dhammaantood meel wax ku wada cuna oo iska war haya, haddii aynu reer Somaliland nahayna dhammaanteen isku qoys baynnu nahay, maantana waa maalintii midnimada, waana duruuf ka wada adag dagaal kasta.“

Sidoo kale, waxa uu madaxweynuhu kormeerkiisa kusoo maray xarunta taliska guud ee ciidamada ilaalada xeebaha, waxana halkaas kusoo dhaweeyey saraakiisha hoggaamisa ciidankaas, isaga oo madaxweynuhu indho indhayn ku sameeyey xafiisyada kala duwan ee xarunta oo ay ka socotay shaqada caadiga ah ee saarkiishu.

Ugu dambayntii waxa uu madaxweynuhu faray ciidamada kala duwan ee qaranka inay xeryahooda iyo goobaha shaqada ku sugnaadaan oo ay yareeyaan tegitaanka suuqyada iyo goobaha kale ee aan muhiimka u ahayn shaqadooda iyo danahoodaba.

Horn Cable Tv

Waaxda ONLINE-ka