Faahfaahin: Dhul Gariir Sababay Dhimashada 26 Qof Iyo Dhaawaca 743 Oo Ka Dhacay Turkiga
31 Oct 2020
Turkey (HCTV) – Waxa kordhay Khasaaraha ka dhashay Dhul Gariir culus oo Jimcihii shalay ku dhuftay badda Aegean Sea, kaasi oo saameeyay Magaalooyin ka mid ah Dalalka Turkiga iyo Giriiga.
Dhul Gariirka oo lagu cabbiray 7.0 magnitude ayaa wuxuu burburiyey illaa 18 dhisme, taasina waxay sababtay inay Dad badan Geeriyoodaan, qaar kalena dhaawacmaan, halka qaarkoodna weli ku hoos jiraan dhismayaasha dumay.
Wararkii u dambeeyay ee ka soo baxaya Dhul-gariirkaasi ayaa sheegaya in Dadka ku dhintay Magaalada Izmir ay gaadhay 26 Qof, halka Kooxaha gurmadka Deg-degga ahina la tacaalayaan Dadka dhaawacmay.
Warku wuxuu sheegaya in 24 Qof uu Dhul-gariirku ku dilay Gudaha Turkiga, halka 2-da Qof ee kalena uu ku dilay Giriigga oo uu saameeyay, taasi oo tirada guud ka dhigaysa 26 Qof.
Sidoo kale, Kooxaha Gurmadka deg-degga ah ayaa Sabtida Maanta ku dhawaaqay in Magaalada Izmir oo Dhul-gariirku aad u sameeyay ay ku dhaawacmeen Dad ka badan 743 Qof.
Dhinaca kale, Magaalada Izmir waxa ku dhufatay Duufaano Daadad wadata.
Horn Cable Tv
Waaxda ONLINE-ka
